# Seguridade e confianza

Vendemos unha app de protección de datos. Sería absurdo que non nos aplicásemos o mesmo. Isto é o que facemos, sen letra pequena.

## Unha instancia por xestoría

Cada xestoría ten o seu propio servidor e a súa propia base de datos. Non hai unha táboa común cunha columna «cliente» que alguén poida ler mal: os datos doutra xestoría non están na túa máquina, así que non hai erro posible que chos ensine.

## Cifrado onde importa

Os datos persoais (nomes, NIF, correos, teléfonos) gárdanse cifrados na base. Quen levase o ficheiro levaría ruído. As copias de seguridade cífranse antes de saír da máquina, así que a copia tampouco vale de nada sen a chave.

## Aloxado na Unión Europea

Os servidores están na UE. Non hai transferencia internacional polo simple feito de usar a app.

## A plataforma non ve os teus expedientes

O sistema que che vende a licenza e che factura vive á parte, coa súa propia base de datos. Sabe que existes e que plan tes. Non sabe que empresas deches de alta, nin que responderon. Isto non é unha promesa: é como está construído.

## Rexistro de quen fixo que

Cada acción sensible queda anotada nun rexistro encadeado: se alguén modificase unha liña antiga, o encadeado rompería e veríase. Serve para demostrar dilixencia se a AEPD pregunta.

## A IA non aprende dos teus datos

Os textos que xera a IA saen dun modelo externo, pero os teus datos non se usan para adestralo, e podes poñer a túa propia chave se prefires que a relación sexa directamente túa.

## O que non che prometemos

Non publicamos unha porcentaxe de dispoñibilidade nin asinamos un SLA. Poñemos os medios (réplica en tempo real entre dous servidores, copias cifradas, vixilancia automática) e dicímosche a verdade na páxina de estado. Un número bonito nunha web non levantou nunca un servidor caído.

## Para os teus clientes

Esta parte está escrita para que lla reenvíes á empresa que vai responder o cuestionario. Pódela copiar tal cal.

A túa xestoría usa unha app para poñerte en regra coa lei de protección de datos. Vaiche chegar unha ligazón con preguntas sinxelas sobre o teu negocio.

O que respondas gárdase no sistema da túa xestoría, en servidores europeos e cifrado. Non se vende, non se comparte e non se usa para publicidade.

Se unha pregunta non a entendes, hai un botón «Non o sei» que cha explica cun exemplo e pon a resposta máis prudente. Pódela cambiar despois.

Ao rematar, saen os teus documentos co teu nome e o teu logotipo. Son teus: pódelos descargar cando queiras.